Angayubagia uningayang titiang majeng ring Ida Sang Hyang Widhi Wasa, duaning majanten sangkaning asung kerta wara nugrahan Ida, mawinan titiang miwah Ida dane sinamian prasida mangguh kerahajengan sekadi mangkin.
Antuk punika, ngiring sinarengan nyakupang tangane kalih ngojarang pangastungkara panganjali:
“Om Swastiastu”
Inggih:
- Ratu Peranda sane suciang titiang
- Ratu Ida Bagus sane baktinin titiang
- Ratu Anak Agung Ngurah sane ksumayang titiang
- Jero Mangku sane sampun ledang rauh sane suciang titiang
- Manggala Dinas saking kluarga purusa miwah keluarga pradana sane wangiang titiang
- Manggala Adat saking keluarga purusa miwah keluarga pradana sane wangiang titiang
- Para panglingsir saking keluwarga purusa miwah pradana sane wangiang titiang
- Para atiti miwah sameton lanang istri sane tan prasida titiang nguningan siki-siki sane tresnain titiang
Garjita dahat manah titiang, santukan Ida dane arsa ledang nagingin pangaptin titiang prasida ngerauhin sekadi mangkin. Mantuk ring kaledangan Ida dane, titiang sakulawarga wantah prasida ngaturang rasa suksmaning manah. Taler, ampurayang indik kakaonan genah, miwah tata basa panyanggran titiang riantuk nambet titiang sane kalintang.
Ida dane sinamian sane wangiang titiang,
Lugrayang titiang nunas galah samatra anggen titiang nyinahang anggan sang alaki rabi sareng kalih. Mungguing sang sane mawiwaha rahina mangkin inggih punika sameton titiang:
Anak Agung Bagus Panji, putran ajin titiang Anak Agung Ngurah sareng Jero Made Sekar.
sane pinaka rabinyane inggih punika:
Anak Agung Istri Diah, putran ajin titiang Anak Agung Dalem sareng Anak Agung Biang Mas, saking Banjar Singapadu.
Inggih, mangda Ida dane ngawikanin, pacang uningayang titiang dudonan upakara sane sampun kamargiang inggih punika:
- Ring rahina Sukra Pon, pinanggal Masehi 11 Desember 2009, sampun kalaksanayang medarma sewaka ring Jero Banjar Ubud.
- Wusan punika, sampun taler kemargiang upacara masakapan utawi makalan – kalan mantuk ring sang alaki rabi sareng kalih, rahina mangkin Wraspati Wage, pinanggal Masehi 17 Desember 2009.
- Raris, yening nenten wenten pialang punapa punapi, sawusan puniki pacang kalanturang majauman utawi muat katipat bantal ke Jero Banjar Ubud sawetara galah siki utawi jam 1.
Inggih, kadi asapunika titiang prasida nagingin panyembramane puniki.
Malih apisan, titiang matur suksma taler nunas ampura yening wenten iwang antuk titiang matur miwah panyanggrane puniki.
Sane mangkin, ledang Ida dane pacang iring titiang masanekan. Durusang irika ring genah bhogane sane sampun kacumawisang:
- Mantuka ring Anak Agung Ngurah sareng sameton lanang aturang titiang iriki ring ungkur sanggah natah
- Sameton sane lianan aturang titiang irika ring ajeng pawaregan
- Sekaa gong lan braya irika ring dangin margi.
Inggih wantah amunika atur titiang. Puputang titiang antuk parama santih.
“Om Santih Santih Santih Om”
Tidak ada komentar:
Posting Komentar